Жанна Жабековадан шеберлік сабағы

2021 жылдың 23 қыркүйек күні Облыстық А.С. Пушкин кітапханасы мен Шығыс Қазақстан облысы. Көкпекті ауданы бойынша білім бөлімінің "Оқушылар шығармашылық сарайы" МКК-мен бірлесе отырып Жабекова Жанна Берікбекқызымен онлайн шеберлік сабағын ұйымдастырды.

Жанна Берікбекқызы – Көкпекті ауылында жеке кәсібін ашып, еңбек етіп отырған жас кәсіпкер, «Қазақстандағы 100 жаңа есім» жобасына есімі еңген жерлесіміз. Он екі мүшесі сау бола тұра тағдырына разы емес көпшілік үшін Жаннаның өмір жолы үлгі боларлықтай. Жанна Берікбекқызының есімі қайсарлықтың, рухы биік жанның үлгісі іспеттес. Көп жыл бұрын ол автокатастрофаға түсіп, мүгедектер арбасына таңылған.
Басына түскен қиыншылыққа қарамастан, қайсар арудың сағы сынған жоқ. Сүйікті ісін тапқан Жанна жұмсақ ойыншықтар, әдемі себеттер жасаумен айналысатын тігін шеберханасымен көпке үлгі-өнеге. Қолөнер бұйымдары бүкіл Қазақстанға ғана емес, шет елдерге де танымал. Жанна – «Қазақстанның үздік тауары» байқауының қорытындысы бойынша «Халық таңдауы» сыйлығының иегері. Нұр-Сұлтан қаласында өткен «Business Lady Qazakstan» республикалық байқауына қатысып, «Lady Motivation-2020» номинациясын алған.
Бүгінде Жанна Жабекова Көкпекті аудандық оқушылар шығармашылық сарайында қол-өнер үйірмесінде жетекшілік жасап, жастарды өнерге баулуда.

• < Артқа
• Алға >