Меценат Дулат Тастекеевпен кездесу

2020 жылы 24 сәуір күні сағат 14.00-де А.С. Пушкин атындағы облыстық кітапхананың ұйымдастыруымен кәсіпкер, меценат, «Tas Group» компаниялар тобының негізін қалаушы, TASCREDIT қаржы компаниясының басшысы, «ASSYLTAS» Қоғамдық қорының президенті Дулат Тұрсынұлы Тастекеевпен тікелей эфирде (Дулат Тастекеевтің Инстаграм әлеуметтік желісіндегі @dulat_tastekeyev жеке парақшасында) кездесу өтеді.

Қазақстандық кәсіпкерлердің жаңа толқынының өкілі, жомарт жүрек, ұлтжанды азаматтың бірі Дулат Тастекеев – Тарбағатай ауданының Екпін ауылының тумасы . Ол өзінің табысты бизнесін жаңа форматта ұйымдастырып, дамытып қана қоймай, біраз жылдан бері қайырымдылықпен де айналысып келеді.
Дулат Тұрсынұлының басшылығымен 2018 жылдан бастап «ASSYLTAS» Қоғамдық қоры құрылды. Қайырымдылық қоры – бірнеше жылдан бері құрылысы тоқтап қалған Семей қаласындағы Орталық мешіт құрылысын қайта жандандырды. «ASSYLTAS» қорының тағы бір ауқымды жобасы – Ақсуат ауылында жыл сайын өтетін «Туған жерге туыңды тік» атты халықаралық ақындар айтысы. Аталмыш шараға тек елімізден ғана емес, алыс-жақын шетелдерден де ақындар келіп қатысады. Айтыс жүлдегерлері қомақты сыйлықтармен марапатталып, жыл сайын бір ақын «ТАСКРЕДИТ» компаниясы тағайындаған шәкіртақыға ие болуда.
Дулат Тұрсынұлы 2016 жылдан бері Тарбағатай ауданының кіші энциклопедиясы іспеттес, киелі өлкенің тарихымен, тарихи тұлғаларымен, аңыз-дастандарымен таныстырып, сұлу табиғаты мен архелогиясынан сыр шертетін «Тарихқа толы Тарбағатай» жинағын шығаруға демеушілік етіп келеді. Сонымен қатар, Тарбағатай өлкесінің сурет қорын құру мақсатында «Ғажайып өлке» жобасы да іске асырылуда.
Тікелей эфирде Дулат Тұрсынұлы қазіргі таңда өзекті болып отырған «Дағдарыс уақытындағы жәрдемдер», «Қаржылық сауаттылық», сонымен қатар «ASSYLTAS» Қоғамдық қорының өлке руханиятын дамытуға қосып жатқан үлесі т.б. тақырыптарда әңгіме өрбітіп, тікелей эфир қатысушыларымен сұхбаттасады.
Баршаңызды тікелей эфирді көруге шақырамыз!

Байланысшы: Абылгазинова Гүлбаршын

• < Артқа
• Алға >