Алмат Сақатов: «Өнерім - өмірім»

Театр және кино актері, сатирик,  жерлесіміз Алмат Сақатовпен кітапханамыздың библиографы Гүлбаршын Абылгазинова  «Өнерім – өмірім» тақырыбында тікелей эфирде салихалы сұхбат өткізді.

Актерлік – Алла берген сый, әкенің қаны, ананың сүтімен даритын ерекше қасиет. Сонымен қатар, актер – адам, актер – тұлға. Ал актерды тұлға жасайтын – еңбегі деп жатамыз. Өзінің еңбегімен, талантымен танымал, Бауыржан Ибрагимовтың әзіл шеберxанасынан түлеп ұшқан өнер иелерінің бірі – жерлесіміз Алмат Сақатов.  
Алмат Шығыс Қазақстан облысы, Марқакөл өңірінің тумасы. Қазақ өнерінің дамуына өлшеусіз үлес қосқан Марат Сақатовтай асылдың сынығы. Марат Сақатов – «Тамаша» әзіл-сықақ тетарының негізін қалаушы, «Бауыржан шоудың» режиссері болды. Алмат та өнердің құнын түсінетін, оның құндылығын ұғындыра білетін белгілі театр және кино актері, сатирик.
Кезінде өнерсүйер қауым «Бауыржан шоу» театрын отбасымен, ауылдағы көршілермен бірге асыға күтетін еді. Балалар мен жастар осы театрдағы жас актерлардың  жалындаған жігеріне, кәсібіне деген риясыз махаббаттарына  сүйсініп, еліктеп өсті. Алмат Сақатовты өнерсүйер қауым сол сахнадан таныды, өнеріне қол соқты.
«Қазір кино саласында жүрмін. Жақында отандық бірнеше телехикаяларға түстім. Адам бойында қанша жаман қасиет болса, соның барлығын кинода ойнадым. Қазір теріс рөлдерге түспеймін. Өйткені, бір образда қалып қойғым келмейді. Жалпы, қазақстандық кино саласының қарқынды дамуы қуантады» – дейді актер.
Шын мəнінде актер табысты мамандық па, актер болу əркімнің қолынан келе ме, сұранысқа ие маман болу үшін не істеу керек? Сахнадағы, кинодағы рөлдері, жалпы шығармашылығы, карантин кезіндегі жеке өмірі туралы Алмат Сақатов өзінің тікелей эфирдегі сұхбатында әңгімелемекші.
Актер жаны – кейде сыршыл, кейде жыршыл, кейде жарқын, кейде тұйық, кейде мұңды келеді. Жерлесіміз Алмат Сақатовтың әңгімесін мына сілтеме арқылы тыңдауға болады: https://www.instagram.com/tv/CEEzRrgg9Lu/?utm_source=ig_web_copy_link

                                                                                          Байланысшы: Абылгазинова Гүлбаршын, тел. +77056241725

• < Артқа
• Алға >