«Ковид. Күзгі толқын»

Кітапхананың ұйымдастыруымен 8 қыркүйек күні белгілі нейрохирург дәрігер Бердіқожаев Мыңжылқы Сайлауұлымен «Ковид. Күзгі толқын» тақырыбында  тікелей эфирде сұхбат өтті.

Мыңжылқы Бердіқожаев – Қызылорда қаласының тумасы. Қарағанды мемлекеттік медицина академиясының түлегі, «Болашақ» бағдарламасымен С.М.Киров атындағы Ресей әскери-медициналық академиясында (Санкт-Петербург) білім алған. «Қазақстанның 100 жаңа есімі» жобасының жеңімпазы.
Отандық эндоваскулярлы нейрохирургияның негізін қалаған Мыңжылқы Бердіқожаев 2008 жылдан бастап Астана қаласындағы Ұлттық нейрохирургия орталығында ми-қан тамырлары және функционалдық нейрохирургия бөлімінде жұмыс істеп, 2014 жылы Алматыдағы №7 қалалық ауруханада интервенциялық хирургия бөлімін ашуға ат салысты. 2016 жылдан бастап Алматы қаласындағы Орталық клиникалық аурухананың эндоваскулярлы нейрохирургия бөлімінің меңгерушісі. Соңғы жылдары 800-ден аса ішкі тамыр жүйелеріне қатысты ота жасалынып, Алматы қаласында инсульттан көз жұму көрсеткішін 2% төмендетті.
Мыңжылқы Сайлауұлы тұрақты түрде халықаралық конференцияларда дәріс оқып, шетелдерде өтетін шеберлік сағаттарына белсенді түрде қатысады. Денсаулық сақтау магистрі, докторанты. Әлеуметтік желілерде белсенділік танытып емделушілерге кеңес беріп отырады.
Тікелей эфир барысында дәрігер Мыңжылқы Сайлауұлы еліміздегі короновирусқа қатысты сұрақтарға жауап берді. Әсіресе «коронавирустың жаңа түрі – қауіпті пневмония ма?», «науқастардың үйден өз бетімен емделуі қаншалықты дұрыс?», «ауру анықталғанда қандай дәрі-дәрмектерді пайдаланған дұрыс?», «бұл аурудың тоқтайтын күні бар ма?», «нейрохирургиялық ауруы бар науқастарға ковидтің әсері» деген тәрізді көңілге алаң ұялатқан сан алуан сұрақтарға жауап берді.

                                    Байланысшы: Абылгазинова Гүлбаршын, тел. +77056241725

• < Артқа
• Алға >