«Ахмет Жұбановтың өнегелі отбасы» онлайн кездесу

29 сәуірде кітапхананың ұйымдастыруымен К. Жұбанов атындағы Ақтөбе өңірлік университетінің ғылыми кітапханасының бас кітапханашысы Сундетова Жания Сагнаевнамен «А.Жұбановтың өнегелі отбасы» тақырыбында онлайн кездесу (Zoom) өтті.

Қазақ музыкасын зерттеуші көрнекті ғалым, әйгілі композитор, дирижер, Қазақстанның халық әртісі Ахмет Қуанұлы Жұбанов 1906 жылы 29 сәуірде Ақтөбе облысы Темір ауданы, Ақжар ауылында дүниеге келген. Ахметтің әкесі Қуан балаларын оқытуды армандайды, осы ниетпен Темір уезіне берілген екі мектептің бірін өз ауылында ашқызады.
1911 жылы Темір уезінде екі орыс мектебі ашылды. Сол жылы оқу бітірген Құсайын есімді мұғалім уезге келеді. Ол Жұбановтар үйінде тұрады. Құсайын домбыра мен скрипка, мондолин тартады, аздап нотадан да хабары болған. Аспаптардың қайсысында ойнаса да, бала Ахмет жанынан табылып, бес жастан аса сол аспаптың бәрінде ойнап кетеді.
"Менің туып-өскен үйім – домбыра, ән, күй, жыр. Көркем әңгімені кәрі-жасына дейін қадірлейтін осындай ауылда өскен мен бес жасымда хат танып, домбыра тартып, өлең айтып, тақпақ жаттайтынмын. Ауылдың қақ ортасында суы мол үлкен құдық болатын, кешке қарай салқын түскен соң ауыл адамдары құдықтың басына жиналушы еді. Ән, күй, жыр тыңдап, ақындар айтысын тамашалайтынмын. Әсіресе, күйге деген ықылас ерекше-тұғын. Күй тартпайтын кәрі-жас, әйел, еркекті кездестірмейтінбіз", - дейді естелігінде Жұбанов.
Ахмет Жұбанов 1933 жылы Алматы музыкалық драма училищесіне ұстаздық қызметке келеді. 1934 жылы бір топ домбырашының басын қосып, қазақ ұлт аспаптар оркестрінің негізін қалаған. Сол оркестрдің көркемдік жетекшісі әрі дирижері болып, оркестрге Құрманғазының атын береді. Осы кезден бастап өмірінің соңғы күндеріне дейін ол қазақтың музыкалық мәдениеті жолында қызмет етті
Жұбановтар әулеті дарын қонған отбасы. Сөзімізге Ахмет өнер саласындағы бірінші академик болғаны, бауыры Құдайбергеннің қазақ тіл білімі саласын зерттеген профессор екені дәлел бола алады. Ахметтің қызы Ғазиза Жұбанова қазақ әйелдерінің ішінен шыққан бірінші кәсіби композитор, жиені Алан Бөрібаев дарынды дирижер.
Құдайберген Жұбанов – қазақ тілінің теориялық негізін қалаушы, қазақ тіл білімінің тұңғыш профессоры, педагог, түркітанушы. Ал оның ұлы Асқар Жұбанов өмірін математикалық лингвистикаға арнаған ғалым.

Өнегелі Жұбановтар отбасы туралы толық ақпаратты К. Жұбанов атындағы Ақтөбе өңірлік университетінің ғылыми кітапханасының бас кітапханашысымен өтетін онлайн кездесуден көріп, тамашалай аласыздар. 

Байланысшы: Кемешева Меруерт; Тел.: 26-13-33

• < Артқа
• Алға >