Тұңғыш Президент Күніне арналған «Не? Қайда? Қашан?» зияткерлік ойыны

Тұңғыш Президент Күні қарсаңында кітапхананың Жастар интеллект-орталығы ұйымдастырған «Не? Қайда? Қашан?» зияткерлік ойыны Елбасының өмірі мен қызметіне арналды. Қызықты әрі танымдық сұрақтардан тұратын ойынға 4 команда қатысты. Олар: қалалық Жайдарманшылар, «Парасат» дебат клубы, «Жүректен-жүрекке» еріктілер клубы және ҚАЕУ студенттері. Ойын «Елбасы көрші мемлекет басшыларын қонақ етіп, отағасы ретінде қандай сыйлық сыйлады?», «Президент мектептен кейін Киевке оқуға баруға дайындалып жүргенде қайда жұмыс істеді?», «Президенттің кітаптар мен газет-журналдарды оқуының өзіндік ерекшелігі қандай?» тәрізді қызықты сұрақтардан басталып, келесі раундарға өткен сайын тапсырмалар қиындай түсті.

Әр раунд арасында патриоттық тақырыптағы әсем әндер шырқалып, ойын соңында Д. Серікбаев атындағы ШҚМТУ студенті Қуатбеков Бақдәулет Елбасыға арнаған Арнауын оқыды.
Ойын нәтижесі барлық қатысушыларды таңқалдырды. Өйткені жеңіске жеткен – Жайдарманшылар командасын құраған мектеп оқушылары Гүлдана Болатова мен Ақбота Әбілметқызы (қалған топ мүшелерінің барлығы студенттер). Жеңімпаздар мен қатысушыларға мақтау қағаздары мен сыйлықтар тапсырылды.

• < Артқа
• Алға >