Мұқағали мәңгілік ғұмыр

5 ақпан күні кітапханада Мұқағали Мақатаевтың 85 жасқа толуына орай «Мұқағали мәңгілік ғұмыр» атты әдеби-сазды кеш өтті.
Қазақ поэзиясының марқасқасы, өмірі өлең, өлеңі өмірге айналған Мұқағали Мақатаевқа арналған кеш ерекше сезім мен сырға толы болды. Ақын өлеңдерін насихаттау, жастар бойында патриоттық сезімді тәрбиелеу мақсатында өткен кеш кітапхана ұжымы мен ҚАЕУ-нің кітапхана факультеті студенттерінің ұйымдастыруымен өткізілді.

Еске алу кешінде Мұқағалидың өмірі мен шығармашылығы жайлы қызықты ақпараттар берілді. Студент жастар Мұқағалидың кітаптарына шолу жасап, әр басылымның ерекшелігімен таныстырды.
Кеш барысында «Еркін микрофон» ұйымдастырылып, жас ақындардың Мұқағалиға арнаған жалынды жырлары тыңдалып, жаңа буынның аяқ алысы бағдарланды.
Көрермендердің Мұқағалидың өлеңдеріне деген құрметі, оны жастардың сүйіп оқитындықтары таң қалдырды. Кеш барысында Мұқағалидың сөзіне жазылған «Саржайлау», «Құмған алған», «Қоңыр күз», «Сенің көзің», «Есіңе мені алғайсың», «Арман-ай» әндері зал ішінде әуелеп төгілді.
Әдемі кеш әсерлі көріністермен, әуезді әндермен есте қалды. Осындай әдемі кештер арқылы алты алаштың ардақтысына айналған ақиық ақын Мұқағали мұрасы ұрпақ жадында жаңғыра түсері анық.

• < Артқа
• Алға >