Тамыз айында Зайсан аудандық ішкі саясат бөлімі мен Орталық кітапхана қызметкерлерінің ұйымдастыруымен В. Ломоносов атындағы орта мектептің 1965 жылғы түлегі запастағы шекара әскерінің  полковнигі Ш. Ибраевтың «Одноклассники» атты естелік кітабының тұсаукесері өтті.

Шараға автордың Ресейден, Семейден т. б. алыс-жақыннан келген сыныптастары, ұстаздары, «Семей таңы», жергілікті «Достық» газетінің тілшілері, өлкетанушы жазушылар мен ардагер кеңесі мүшелері, мұражай, мұрағат  қызметкерлері, ішкі саясат бөлімі, білім бөлімі қызметкерлері, мәдениет бөлімінің әншілері, В. Ломоносов атындағы мектеп оқушылары мен ұстаздары қатысты.

«Елу жылда ел жаңа» демекші, жарты ғасыр уақытты артқа тастап, алтын ұя мектептеріне қайта оралған құрдастар мөлдір шақты еске алып, сол кезге қайта оралғандай болды. Ш. Ибраевтың «Одноклассники» кітабында Шығыс Қазақстан облысы, Зайсан тарихы, табиғаты, аталмыш мектептің тарихы мен ардагер ұстаздары мен замандастары туралы кең ауқымды әңгімелейді.  Зайсан ауданының құрметті азаматы К. Ыдырышев басылымның жас-жеткіншектерді тәрбиелеуде отансүйгіштікке, білімге деген құштарлығын арттыруда, өлкесін танып білуде маңыздылығы зор екендігін тілге тиек етті. Кездесу кешінде достар ұстаздарына алғыстарын білдіріп, сыйға кітап тарту етті. Әсем ән тыңдап, вальс биледі, естелік суретке түсті.