«100 нақты қадам - Ұлт жоспарын жүзеге асыру жолында»

2015 жылғы маусымның 12-де Бесқарағай ауылында облыстық кітапхана қызметкерлерінің қатысуымен Ұлт жоспары - мемлекет басшысы Нұрсұлтан Назарбаевтыӊ бес институционалдық реформаны жүзеге асыру жөніндегі «100 нақты қадамын» зерделеу және талқылау мақсатында «100 нақты қадам - Ұлт жоспарын жүзеге асыру жолында» тақырыбында аймақтық семинар өтті.

Аталмыш жиынға Абай атындағы облыстық кітапхана, Семей қалалық орталық кітапхана, Бесқарағай, Абай, Бородулиха аудандары, Қайнар орталық кітапхана жүйесі, Мұқыр ауылдық кітпаханаларының директорлары мен мамандары қатысты. Аймақтық семинарды Шығыс Қазақстан облыстық кітапхана директорының орынбасары Бибігүл Шагиева ашып, жиынға қатысушыларды семинардың мақсатымен таныстырып, негізгі тақырып бойынша әңгімелеп берді. Ол кітапхана ісін жетілдіру және кітапханашылардың біліктілігін арттыру мәселелеріне Ұлттық жоспарда белгіленген қадамдардың тарихи маңыздылығына, келешегі зор екендігіне ерекше назар аударды. Елбасының халыққа жолдаған 100 нақты қадамын іс жүзінде жүзеге асырудың жолдарына тоқталды. Бұл жоспар барша қазақстандықтарды бірлікті бекемдеп, аянбай тер төгуге шақырады. «100 нақты қадам» бағдарламасы жөнінде ой-пікір бөліскен талқылау болды. Қатысушылар 5 топқа бөлініп, бес институционалдық реформаны жүзеге асыруда кітапханалар қандай қызмет түрлерін ұсынуға болатыны туралы жобалар әзірлеп қорғап, пікірталас өтіп, ұсыныстар айтылды.
Семинардың екінші бөлімінде қатысушыларға ұлы Абайдың 170 жылдық мерейтойы аясында Семей қаласындағы Абай атындағы облыстық кітапхана мамандары «Абай оқыған әдебиеттер әлемі: кең көлемді электронды ретро-көрмеге шолу» және «Абайдың музыкалық мұрасы» жайлы танымдық ақпарат берді. Абай әндері және Абай туралы әндерді ақын, өнертанушы Қ.Ж. Нұрқасымов орындап,слайдтар көрсетілді. «Біздің Абай» электрондық кітапханасына енгізілген жаңа мәліметтермен танысты.
Жыл сайын Республика көлемінде өткізілетін "Бір ел - бір кітап 2015" акциясыаясында Ілияс Есенберлиннің "Көшпенділер" трилогиясы бойынша атқарылып жатқан жұмыстар жөнінде ақпараттар мен кеңестер ұсынылды.

• < Артқа
• Алға >