Кітапхана «Ән әлемінің жарық жұлдызы» Әміре Қашаубаевтың 130 жылдығын атап өтті.

5 сәуір күні, кітапханада "Рухани жаңғыру" бағдарламасы аясында қазақ халқының дүлдүл әншісі Әміре Қашаубаевтың 130 жылдық мерейтойына арналған «Ән әлемінің жарық жұлдызы» атты әдеби-музыкалық кеш өтті. Кешті қаламыздағы "Жұлдыз"өнер мектебінің маманы Қуаныш Еркін жүргізді. Іс-шараға өнер сүйер қауым, студенттер мен мәдениет қызметкерлері, жерлес ақын-жазушылар, мұғалімдер келді.

Музыкалық кештің негізгі қонақтары Шығыс Қазақстан облыстық Әміре Қашаубаев атындағы Семей мемлекеттік филармониясының әншілері. Халықаралық және республикалық байқаулардың жүлдегерлері Берік Омаров пен Мейрамбек Ахметов, қаламыздағы Ертіс концерт мекемесінің әншілері Әділ Тұрғанбаев, Қуаныш Оралбаев, Абаш Кәкеновтер көрермен қауымға Әміре Қашаубаевтың репертуарынан әндер ұсынды. 

Басқосуда 130 жылдық тойының алдында кітапхана қорына келіп түскен Жарқын Шәкәрімнің жуықта жарық көрген «Амре в Париже: Историко-биографический очерк о трагической судьбе выдающегося казахского тенора Амре Кашаубаева» туындысы қонақтарға таныстырылып, қонақтарға кітап авторының бейне жолдауы ұсынылды. Біздің тұрақты оқырманымыз Зейнеп Машкенова кітаптың авторымен Аягөз ауданы Сергиополь ауылында бір сыныпта оқыған екен. Зейнеп апай Жарқын Шәкәрімдей жерлесінің бар екенін мақтан тұтатынын айтып, естеліктерімен бөлісті.Сондай-ақ қонақтар әншінің өнері мен шығармашылығы туралы кітап көрмесімен танысты.

Байланысшы: Ашкенова Ж

Байланыс тел.: 26-39-46

• < Артқа
• Алға >