Рухани жаңғыру: Семей қаласының тарихына экскурс

Семей – Абай Құнанбаев, Шәкәрім Құдайбердіұлы, Мұхтар Әуезов сынды танымал тұлғалардың отаны. Бұл қаланы қай жағынан алсаңыз да құнды әрі қызықты деректерге толы: ерекшелігімен есте қалар тарих, танымал тұлғалар... 

2 қараша күні кітапханада Қазақстанның рухани Меккесі - Семей қаласының тарихына байланысты сұрақ-жауап кеші өтті.

Іс-шараға қатысушылар Семей қаласының Қазақстанды Ресей және Орталық Азиямен ғана емес, сонымен қатар Батыс Қытаймен байланыстыратын сауда орталығына айналу себептерін білді.
1918 жылы Семей қаласы ресми түрде Алаш автономиясының астанасы деп жарияланып, қалада Әлихан Бөкейхановтың басшылығымен Алаш-Орда үкіметі орналасты. Кездесу қонақтары Семей қаласының тарихына байланысты басқа да ғажайып фактілер және ақпараттармен таныс болды.
Дәл осы Семей қаласында 1913-1914 жылдары алғашқы қазақстандық футбол командалары пайда болды. Тұңғыш «Ярыш» футбол командасының қатысуымен өткен бірінші халықаралық жарыс алаңы қайда орналасқан? Алғашқы қазақстандық футболшылардың фотосуреттерін, соның ішінде осы команда құрамында болған «Абай жолы» романымен елімізді әлемге танытқан танымал жазушы жас М.Әуезовтің суретін қайдан көруге болады? Осы және басқа да сауалдарға жауап алды. Тарихи-өлкетану мұражайының және Семей қаласының жаңа тарихы бойынша құжаттар Орталығының өкілдері бұрынғы Алаш автономиясының астанасы туралы тың мәліметтер ұсынды. Ал, белгілі блоггер, ҚР Жастар мәслихатының депутаты Жасұлан Құрманғалиев қазіргі Семей қаласының жаңа келбетін авторлық бейнеролик арқылы көрсетті.
Кездесуге өлкетанушылар, тарихшылар, мұражай мен мұрағат қызметкерлері, мұғалімдер, студенттер қатысты.

• < Артқа
• Алға >