Әбдіжәміл Нұрпейісовтың сырлы монологы

24 қазан сағ. 15.00-де А.С. Пушкин атындағы Шығыс Қазақстан облыстық кітапханасы барлық педагогикалық және шығармашылық интеллигенцияны, студенттер мен оқушыларды қазақ және әлем әдебиетінің патриархы Әбдіжәміл Нұрпейісовтың 95 жылдығына арналған әдеби кездесуге шақырады.

Әбдіжәміл Нұрпейісов өзі жайлы былай дейді: «Мен қазақпын, болмысқа деген қарым-қатынасымның барлық ерекшеліктері, менің рухымның бүкіл құрылымы туғаннан-ақ ана тілдің дыбысынан, бозторғайдың үнінен, шөптердің иісінен және қазақ даласының әндерінен, оның ерекше философиялық көңіл-күйі мен сұлулығынан нәр алды». Міне, бұл – Ә. Нұрпейісовтың шынайы келбеті. Жазушы әлемді осылайша түсінген әрі қабылдаған және оның кітаптарында да әлем дәл осындай сипатта берілген.
Әбдіжәміл Нұрпейісов әдебиетке екпіндей еніп, өзінің ерекшелігімен таңқалдыра білді. Мұхтар Әуезов «Қан мен тер» трилогияның бірінші кітабын оқи отырып: «Мұндай дүниелердің қазақ тілінде жарық көруі – әдебиетіміздің жарқын болашағын көрсетеді» деген. Ал көрнекті әдеби сыншы Лев Аннинский Әбдіжәміл Нұрпейісов арқылы «қазақ әдебиеті ұлттық "ғарыштың" негізіне лайықты үлкен көркем күштің ұлттық эпопеясына ие болғандығын» айтады.
Ә. Нұрпейісов шығармалары әлемнің 50 тіліне аударылған. Жазушы сөресінде оның француз, неміс, испан тілдерінде, бұрынғы КСРО халықтарының тілдеріндегі басылымдары орын алған. Ақтөбеде "Қан мен тер" трилогиясының кейіпкерлеріне, ал Аралда Әдебиет үйінің жанында «Соңғы парыз» романының кейіпкерлеріне ескерткіш орнатылды.
Әбенің (жазушыны достары мен әріптестері солай атаған) кітаптары оқырман жүрегінен орын алып, жарты ғасыр бойы өзінің ерекшелігімен баурауда. Қаламгердің әр туындысы өзіне ғана тән асқан шеберлікпен алған нысанасына жетіп, тақырыбын ашып, идеясын насихаттайды. Әбдіжәміл Нұрпейісовтың сырлы туындыларын кітапхананың электронды каталогынан қарап, оқу залынан сұрап, оқыңыз, қайталап оқып, жазушының терең ойларынан нәр алыңыз!

• < Артқа
• Алға >