Рухани жаңғыру: Ақын Қалқаман Сариннің жаңа кітабының тұсаукесері

21 ақпан күні А. С. Пушкин атындағы Шығыс Қазақстан облыстық кітапханасында ақын, Қазақстан Жазушылар одағының мүшесі, «Шабыт» фестивалінің, «Дарын» мемлекеттік жастар сыйлығының лауреаты, «Алтын қалам», «Туған тілім – тұғырым» әдеби сайыстарының жеңімпазы Қалқаман Сариннің «Екеуіміз...» атты жаңа өлеңдер жинағының тұсаукесері өтті.

Ақынмен кездесу сұхбат түрінде өтіп, шара барысында автор өзінің жаңа өлеңдерін оқып, қонақтардың сұрақтарына жауап берді. 

Автор жастар арасында «Қазақстан» телеарнасындағы «Жайдарман» КВН-ның қазылар алқасының мүшесі және «Астана» телеарнасындағы «Кеш емес» бағдарламасының жүргізушісі ретінде белгілі, әрі ақынның өлеңдеріне жазылған көптеген әндерді қазақ эстрадасының жұлдызы Мейрамбек Беспаев орындайтынын да айта кеткен жөн.

Жерлесіміз Қалқаман Айымғазыұлы «Арманымның бейнесі», «Құс жолындағы керуен» өлеңдер жинағының, «Қызыма», «Күзгі бақ», «Жібек сезім» ән мәтіндерінің, «Жібек сезім – Жүрек сөзім» үнтаспа жинағының авторы.

Гульбаршын Абылгазинова, библиограф:
Қалқаман Сариннің ақындық қабілеті оның републикалық поэтикалық байқауларға ұсынған алғашқы шығармаларынан-ақ бағаланған. ҚР Тұңғыш Президенті – Ұлт Көшбасшысы Қорының әдебиет және поэзия саласындағы беделді сыйлығына 73 үміткердің ішінен отандық мәдениет пен өнерге қосқан қомақты үлесі үшін талантты жас ақын Қалқаман Сарин топ жарды.

Оқырман жүрегінен орын ала білген қаламгердің шығармалары әр жастағы жыр сүйер қауымның арасында кеңінен танымал. Ақын «Екеуіміз...» атты жаңа жинағында қазақтың қара өлеңін өзіндік бояумен өрнектеп, ерекше реңк берген. Ақынның жаңа жинағы кітапхана сөресінен лайықты орын алып, оқырманын күтуде!

Фотосуреттерді фейсбуктегі парақшамыздан көре аласыздар  https://www.facebook.com/groups/pushkinlibrary.kz/?fref=nf

Байланысшы:Ашкенова Ж., тел. 261333 (119)

• < Артқа
• Алға >