Үржар аудандық орталық кітапханасының онлайн-орталығында ағымдағы жылдың  11 ақпанында Мұқағали Мақатаевтың 85 жылдығына   ауданымыздың  6 мектебінің 8-10 сынып оқушылары  арасында  «Хантәңірінің мұзбалағы- Мұқағали» атты мәнерлеп оқу сайысы өтті.

Аталған іс-шараны ұйымдастырушылар - аудандық кітапхана ұжымы мен «АСК» жастар альянсы. Шараның мақсаты: Мұқағали Мақатаевтың ақындық талантын оқушыларға насихаттау, поэзия әлеміне, сөз өнеріне сүйіспеншіліктерін арттыру. Сайыс кеші шымылдығын  жүргізушілер А.Маратов пен Е.Абенгазиева  ашып,кештің мазмұнды өтуіне мұрындық болды. Мәдениет Үйінің  қызметкерлері –әншілер: Ә. Каниев, Г. Сейтқалиева, Е. Қарқынов, кітапханашы Г.Ақжігітова  Мұқағалидың әндерін құйқылжыта шырқап, кештің шырайын келтірді. Іс-шара барысында  Интернет желісінен «Мұқағали Мақатаев өз дауысы» , «Пай, пай, Өмір! Өтесің-ау бір күні...» бейне –сюжеттері көрсетілді. 

Жыр сайысында 3 топқа бөлінген қатысушы оқушылар Мұқағали Мақатаевтың өлеңдерін нақышына келтіріп  мәнерлеп оқыды. Сайыскерлер арасынан шын мықтыларды анықтау аудандық Мәдениет Үйінің директоры М.Кебіспаева, аудандық ішкі саясат бөлімінің маманы-Б.Мақсатқызы, аудандық тілдер дамыту бөлімінің жетекші маманы А.Микенова,аудандық кітапхана директоры С.Ибраева,Тұрлыханов орта мектебінің ұстазы С.Умрахимов  бастаған қазылар алқасына оңайға түспеді. 1-орынды Тұрлыханов атындағы мектебінің 10 сынып оқушысы Б.Толықбаева;  2-орынды Абай орта мектебінен Т.Кеңесова, ӘММ-нен Қ.Советбекова, Крупская орта мектебінен  К.Кемелбекова;  3-орынды  Жансүгіров орта мектебінен  Ә.Максұтқанқызы, Тұрлыханов атындағы орта мектебінен  Т.Серікова, Б.Момышұлы орта мектебінен І.Әсембаев  иеленді.

  Кітапхана директоры іс-шара барысын қорытындылап, « ақиық ақынымыз Мұқағалидың өлеңдерін -рухани қазынасын ұлт иелігіне асыратын XXI ғасырдың жастары-сендерсіңдер!», -дей келіп,қатысушы оқушыларға, ұстаздарға,кеш қонақтарына алғысын білдірді.

   Кеш соңында ұстаздар  және ӘММ ұжымы атынан Б.Садуакасова жүрекжарды пікірлерін айтып,ұйымдастырушыларға алғыстарын  білдірді.

 Алдағы уақытта да осындай тәрбиелік маңызы бар іс-шаралар жалғасын табады деген  оймен қатысушылар көңілді тарқады.